Pipila ka mga bao-bao ang nasikop, naisyuhan og violation ticket, ug na-impound human nasapon nga mibiyahe agi sa national highway atol sa paglusad sa Task Force for Special Operation batok sa mga bao-bao, tricycles ug uban pa nga mga sakyanan nga gidid-an nga moagi sa national highway, Huwebes, Hulyo 27, 2023.

 

Hinuon, mapasalamaton ang Task Force sa pagpangulo ni Engr. Nonito Oclarit, dep’t manager sa Roads and Traffic Administration (RTA), kay walay mibiyahe nga mga bao-bao agi sa national highway human nasayran nga magpahigayon og operasyon ang hiniusang pwersa sa syudad ug national nga ahensya sa gobiyerno sama sa LTO, LTFRB, DPWH, Police Regional Mobile Group, Cocpo, RTA ug nagkadaiyang buhatan sa city hall.

 

Gani, adunay checkpoint nga gipahimutang gikan sa Barangay Bugo paingon sa Barangay Lapasan aron mabantayan ug masikop ang moagi nga mga bao-bao.

 

Apan adunay pipila nga dili molupyo ning syudad ang nasikop kay wala sila nasayod nga adunay operasyon ang Cagayan de Oro batok sa mga bao-bao nga moagi sa national highway.

 

Gipadayag ni Engr. Oclarit nga magpadayon kini nga operasyon alayon sa Memorandum Circular No. 2020-036 sa Department of Interior and Local Government (DILG) kalabot sa pagdili sa mga tricab, tricycle, motorela ug uban pa nga mga prohibited vehicles nga moagi sa national highway. (ALR/CIO/Photos by Reynan Baylin/CIO)