GILUSAD sa Oro Youth Development Office ang 'Seal for Most Child-Friendly Police Station,' atol sa pagpakayab sa nasudnong bandila, Hulyo 31, diha sa city hall quadrangle, ning siyudad.

 

Kini na ang ikatulo ka tuig sa maong kalihukan sa tinguha nga ma-promote ang mga katungod sa kabataan ug mapakita nga dili angay kahadlokan ang mga kapolisan tungod kay sila 'partners' sa LGU-CDO diha sa pagprotehir sa mga kabataan.

 

Nasayran nga kini gitawag kaniadto og 'Search for Most Child-Friendly Police Station.'

 

Nangulo sa launching sila si City Administrator Atty. Roy Hilario Raagas, City Councilor Dra. Malou Gaane, Atty. Joey Abbu, Romeo Calizo, Roger Abaday ug Ian Achas, City Council for the Protection of Children Vice Chairperson Jonah A. Domingo, Oro Youth Development Officer Lord Saver 'Vhaugne' Centina, City Social Welfare and Development (CSWD) Department Officer Anecia Tongson lakip mga kapolisan ning dakbayan.

 

Tipik sa mga aspeto nga susihon ang child-friendly space, women and children's desk officer, confidentiality ug safekeeping sa mga dokumento, ug kaso nga naglambigit sa mga minor de edad, pagmonitor ug pagproseso niini, ug ang precautionary measures kon kini biktima man, akusado ug uban pa. (NLB/photos by Reynan Baylin/CIO)