Mipasundayag ang 12 ka mga Kagay-anon sa ilang managlahi nga talento sa gihimong Grand Finals sa 1st Mayor Rolando "Klarex" Uy Talentadong Kagay-anon sa Plaza Divisoria kagahapong adlawa, Agosto 20.

Sa maong kalihukan, migulang grand champion si Arnel Nadonza kon diin nasakmit niini ang cash prize nga 20,000 ingun man trophy.

 

Gisundan kini sa 1st runner up nga si JB Kurt Payla kun diin nakuha niini ang P15,000 ug trophy, ingon man si Hanh Felicity Agawin nga nahimong 2nd runner up nga adunay premyo nga P10,000 ug trophy.

Nasayran nga ang 12 ka mga Kagay-anon miagi sa qualifying rounds nga gipahigayon sa Brgy. Lapasan, Brgy. Mambuaya ug Brgy. Carmen.

 

Nunot niini, gipasalamatan ni Councilor Bernie "Bitokbitok" Esparcia, kinsa'ng nahimong Co-chair sa maong aktibidad, si Mayor Rolando Klarex Uy sa pagsalig kaniya nga magmugna sa maong kalihukan alang sa pagdiskubre sa talento sa mga Kagay-anon.

 

Ang Talentadong Kagay-anon parte gihapon sa mga nakalinya nga aktibidadis sa usa ka bulan nga Higalaay Festival agi'g pagpasalamat sa mahal nga patron sa dakbayan nga si St. Agustine. (AMTB/ Photos by Rod Constanino/CIO)