MIDUYOG ang kagamhanang lokal sa Cagayan de Oro ubos sa administrasyon ni Mayor Rolando ‘Klarex’ Uy pinaagi sa Community Improvement Division – Cooperative Program sa pagsugat sa selebrasyon sa Cooperative Month, kagahapon, Oktubre 1 ning tuig.

 

Agi’g pagtamod sa Republic Act 11502 o ang pagdeklara sa bulan sa Oktubre isip Coop Month, gipasiugda sa Regional Cooperative Development Council 10 ug Cooperative Development Authority 10 ang opening salvo, diin gisuportahan kini sa nagkadaiyang kooperatiba, nasudnong ahensya ug lokal nga pangagamhanan.

 

Gisugdan ang maong programa sa usa ka parada diin gisalmotan usab sa dul-an gatos ka mga sakop sa City Hall Multipurpose Cooperative (CHEMCO), aduna usab santos nga misa, ug mapasigarbuhon usab nga gipresentar ang mga Mr. and Ms. Coop candidates.

 

Ang Coop Month 2023 nagdala sa tema nga “Cooperatives: Pioneering the Path to Recovery Amidst Modern Challenges of Climate Change and Food Security”.

Lakip sa mitambong sa maong kalihokan si City Councilor Roger Abaday ug Councilor Imee Rose Moreno, chairperson sa Committee on Cooperatives sa 20th city council, kinsa kusganong mipadayag sa iyang suporta sa kalihokan sa kooperatiba.

 

Gipunting usab ni Councilor Moreno ang kamahinungdanon sa lagsik ug buhi nga diwa sa pagtambayayong ug kurambos diha sa kooperatiba aron matabangan ilabina ang mga micro-coops nga molambo. (AGP/Photos Jay Arancon/CIO)