GIPASALAMATAN ni Mayor Rolando “Klarex” Uy ang City Disaster Risk Reduction and Management Department, City Local Environment and Natural Resources Office (Clenro), Cagayan de Oro Police Office COCPO) ug Roads and Traffic Administration (RTA) sa hapsay, malampuson ug malinawon nga kasaulogan sa ‘Kalag-Kalag 2023’ dinhi ning syudad.

Sa mensahe ni Mayor Klarex atol sa pagpakayab sa nasudnong bandila adlaw’ng Lunes, iyang gidayeg ang makugihon ug makanunayong serbisyo sa mga personahe sa maong mga buhatan taliwala sa kainit, ulan ug kahuot sa katawhan.

Nasayran nga dili momenus 5,000 ka mga pamilya, kahigalaan ug kabanay sa mga mipanaw na ang miduaw sa nagkalain-laing pribado ug pampublikong sementeryo ning syudad base sa taho sa Incident Management Team/CDRRMD nga gipangulohan ni Mr. Nick Jabagat. Gani man, gikataho usab sa IMT/CDRRMD nga walay dagkong panghitabo nga ilang narespondehan atol sa All Saints ug All Souls Day observance.

Subay niini, gipasalamatan usab sa mayor ang katawhan sa dakbayan sa ilang kooperasyon aron malinawon ug malampuson ang maong pag-obserbar. (ACM/CIO Photos/IMT CDRRMD)