ARON mas mapalapdan pa ug mahatagan og saktong pagtagad ang medical needs sa katawhan ning syudad, dugang pang kahimanan ang laumang sugdan sa dili madugay sa JR Borja General Hospital (JRBGH).

 

Matud ni Dr. Ferdinand Miranda, Chief of Hospital sa JRBGH, sugdan na ang pagmugna og 150 bed capacity nga Emergency Room kun itandi sa kasamtangang siyam (9) lamang ka bed capacity, aron mahatagan og kasayon ang mga pasyente nga modangop niini.

 

Dugang ni Dr. Miranda dugangan usab ang kasamtangang Critical Care Unit (CCU) bed-capacity ug mahimo na kining 25 bed capacity Intensive Care Unit (ICU).

Subay niini, dako ang pasalamat ni Dr. Miranda ug mga personahe sa JRBGH sa kanunay nga suporta ni Mayor Rolando “Klarex” Uy ug sa iyang dakong panlantaw sa panglawas sa katawhan ning syudad.

 

Kahinumdoman nga nahatagan na gayud sa Level II accreditation ang JRBGH ug aduna na kini 175 bed-capacity ning tuiga lamang, apan kulang pa gihapon kini sanglit mas daghan pa ang midangop sa maong hospital. (ACM/CIO Photos)