GIDAYEG ni City Mayor Albert D. Chua sa Batac City, Ilocos Norte ang kagamhanang lokal sa Cagayan de Oro ubos sa pagpangulo ni City Mayor Rolando ‘Klarex’ Uy sa ilang nakat-onan kalabot sa mga best practices sa LGU-CDO kabahin sa ‘Volunteerism & Active Citizenship’.

 

Kini human mihimo’g benchmarking activity ang delegasyon sa LGU-Batac dinhi sa Cagayan de Oro pinaagi sa pagtulay sa Philippine National Volunteer Service Coordinating Agency aron tun-an ang mga kalihokan sa bolunterismo sa syudad.

 

Pipila sa mga buhatan ang nagpa-ambit sa ilang kasinatian sa ‘volunteerism efforts’ ang City Local Environment and Natural Resources Office, Community Affairs Office, City Social Welfare and Development Office, City Scholarships Office ug Cagayan de Oro City Police Office, diin gipunting ang mahinungdanong papel sa hugot nga partisipasyon sa katawhan ug komunidad.

 

Partikular nga gidayeg ni Mayor Chua ang istratehiya sa syudad sa hapsay nga pagsukip o ‘integration’ sa bolunterismo sa mga programa sa matag buhatan alang sa edukasyon, kinaiyahan, panglawas ug uban pa. (AGP/Photos by Kim Zaldivar/CIO)