MOKABAT 600 ka mga bata uban sa ilang ginikanan ang miduyog sa ika-31 nga kasaulogan sa ‘National Children's Month’ human gipahigayon ang kick-off ceremony sa LGU-CDO uban ang City Council for the Protection of Children (CCPC), Nobyembre 5, diha sa Xavier University-Ateneo de Cagayan Senior High School Complex, ning siyudad.

 

Unang gipahigayon sa maong kick-off ceremony ang fun run with fun color bubbles nga gisundan sa larong pinoy ug hamubong programa.

 

Atol sa programa, nanumpa ang mga bata uban sa ilang ginikanan lakip ang mga miyembro sa CCPC sa 'Panatang Makabata', samtang mihatag sa ilang tagsa-tagsa ka mensahe si City Social Welfare and Development (CSWD) Department Officer Annie Tongson, CDO CCPC Vice Chairperson Jonah Domingo, Council for the Welfare of Children (CCWC) Executive Director Usec. Angelo M. Tapales, City Councilor Girlie Balaba kinsa mirepresentar ni Mayor Klarex Uy ug Beethoven Allena, Regional Coordinator sa Regional Council for the Welfare of Children.

 

Gawas niini, adunay libreng booth nga gitanyag ang CSWD Psychosocial Division. Nakapahimulos usab ang mga bata sa libreng school supplies ug pagkaon nga giapud-apud sama sa popcorn, cotton candy, ice cream ug uban pa.

 

Ang kick-off ceremony ning tuig gipaluyohan sa Department of Social and Welfare Development X, Commission on Human Rights, CCWC ug proyekto sa World Vision nga gitawag og Protect Against Child Exploitation (Project ACE).

Nasayran ang tema ning tuig nakatutok sa mga katungod sa mga bata sa himsog nga panglawas kon "Healthy, Nourished, Sheltered: Ensuring the Right to Life for All." (NLB/CIO/photos by Roel Felicitas/CIO)