MUABOT sa usa ka libo ka mga sakop sa senior citizens sa Cagayan de Oro ang mitambong sa kasaulogan sa ‘Elderly Filipino Week’ diha sa Atrium, Limketkai mall kagahapon, Nobyembre 9 ning tuig.

 

Ang maong kalihokan gipasiugda sa kagamhanang lokal sa dakbayan pinaagi sa Office for Senior Citizens Affairs (OSCA) ug City Social Welfare and Development (CSWD) agi’g pag-ila sa mahinungdanong papel sa mga senior citizens sa katilingban.

 

Miduyog sa kasaulogan si City Councilor Suzette Magtajas-Daba kinsa mirepresentar ni Mayor Rolando ‘Klare’ Uy.

 

Sa iyang kabahin, gihisgutan usab ni City Councilor Yevonna Yacine B. Emano, chair sa Committee on Senior Citizens, ang bag-ohay lang natapos nga budget hearing ingon man ang mga priority programs alang sa mga senior citizens sa dakbayan.

 

Garbo usab nga nakatambong gikan pa sa kaulohan si Commissioner Atty. Franklin M. Quijano sa National Commission on Senior Citizens kinsa gipunting ang mga balaod ug pribilihiyo sa mga senior citizens, ingon man ang kontribusyon nila sa pag-uswag sa komunidad.

 

Anaa usab ang presensya sa mga nagpaluyo sa programa sa senior citizens sa syudad nga sila si Ms. Anecia C. Tiongson, acting CSWD officer; Ms. Joan Mae Acraman, supervising social worker on senior citizens; ug si Ms. Coleen Ancajas-Chaves, senior citizen focal person. (AGP/Photos by OSCA)