LAKIP sa tukoron sa City College of Cagayan de Oro karong 2024 ang labing unang Artificial Intelligence laboratory sa tibuok Mindanao.

 

Matud ni City College President Dr. Jestoni P. Babia, ED., D, nga sugdan ang katukoran niini sunod tuig, dungan sa pagtukod usab sa Administrative, Lecture ug Dormitory Buildings lakip ang covered court, 400-meter track and field ug soccer field ug ang RISE Innovation Hub nga mao ang entrepreneur arm sa city college.

 

Sa pakigpulong ni Dr. Babia atol sa ‘HINABI Summit 2023’, iya usab gipasalamatan ang tanan nga miabag ug mitabang sa kanhi namugna nga Cagayan de Oro Technical Vocational Institute (CDO TVI) nga karon City College of Cagayan de Oro ug sa mga nahimong kabahin sa paglawig ug paglambo niini ilabina ang mga pribadong kompanya nga midawat sa mga mitapos sa ilang tech-voc skills.

 

Kahinumdoman nga pormal nga gibuksan ang City College of Cagayan de Oro human milagda og Usufruct Agreement ang kagamhanang lokal sa pagpangulo ni Mayor Rolando “Klarex” Uy tali Indigenous People of Nahilaran sa Brgy Dansolihon ning syudad niadtong Septiyembre 19, 2023. (ACM/Photos by KIM ZALDIVAR/CIO)