SA tinguha nga mas mapalambo ug malangkubon ang edukasyon dinhi ning syudad, malampusong gitapos ang labing unang ‘HINABI Stakeholders’ Summit’ nga gipasiugdahan sa City College of Cagayan de Oro adlaw’ng Martes, Nobyembre 28 dinhi ning syudad.

 

Kapin sa 200 ka mga partisipante gikan sa pribado ug pampublikong sector lakip non-government organizations, mga industriya, Higher Education Institutions (HEI), youth ug technical vocational institutions ang mitambong ug mipadayag sa ilang suporta alang sa kalamboan sa Cagayan de Oro City College sa pagsugod niini.

 

Ang HINABI gipasiugdahan sa kagamhanang lokal ning syudad ubos sa administrasyon ni Mayor Rolando “Klarex” Uy ilawom sa iyang RISE agenda diin usa sa mga prayoridad ang edukasyon, uban sa pag-abag sa Oro Youth Development Office, USAID Opportunity 2.0, Out-of-School Youth Development Alliance ug Philippine Business for Education (PBEd).

 

Tumong sa HINABI nga makakuha og kahibalo mahitungod sa Philippine Higher Education, TVET system, ug workforce development aron masulosyonan ang job-skills mismatch ug demand skills.

 

Subay niini, dako ang kalipay ug pasalamat ni City College Interim President Dr. Jestoni Babia sa mga mitambong ug mihatag sa ilang panahon alang sa kalamboan sa edukasyon. (ACM/Photos by KIM ZALDIVAR/CIO)