Hugot nga gisuportahan ni Mayor Klarex Uy ang pinakaunang Scholars' Cup, Enero 27-28, diha sa Misamis Oriental Integrated Sports Complex, ning siyudad.

Sa iyang pagbisita, gipasalamatan sa mayor si City Scholarships Office Head Richel Petalcurin-Dahay uban sa mga volunteers sa kalampusan niini.

 

"Salamat kaayo nga wala ninyo sayanga ug usiki ang higayon nga inyong masinatian sa unang higayun ang makig-uban sa paki'gdula, paghatag og kalingawan sa tagsa-tagsa ug kaugalingon ug mismo sa inyo mga kauban nga city scholars," saysay ni Mayor Klarex Uy.

 

Ang Scholars' Cup nahitabo sa pinakaunang unang higayon ubos sa inisyatiba sa City Scholarships Office uban sa tinguha nga mabaid ang kinaiya ug disiplina sa mga city scholars pinaagi sa paugnat sa kusog.

Kini gilangkoban sa mga dula sama sa Basketball, Volleyball, Mind Games , E-Games, Larong Pinoy lakip usab cheer chant competition ug gisalmotan sa kapin 5,000 ka city scholars.

 

Gawas ni Mayor Klarex, mitambong usab sila si Committee on Education Chairperson City Councilor Suzette Magtajas- Daba, Sangguniang Kabataan Federation President Kenneth John Sacala kinsa nangulo sa pagbukas sa maong kalihokan. (NLB/CIO/photos by Roel Felicitas and Reynan Baylin/CIO)