DAKO ang pasalamat sa Department of Education-Division of Cagayan de Oro (DepEd CDO) kang Mayor Rolando “Klarex” Uy sa dugang 2-storey, 4-classroom building nga tukoron sa Malasag Elementary School sa barangay Cugman ning syudad.

 

Matud ni Schools Division Superintendent Dr. Roy Angelo E. Gazo, wala gayud kalimti ni Mayor Klarex ang kaugmaon sa mga kabataan ug sa dako niining gugma ug pagtagad sa edukasyon.

 

Kini human gipangulohan mismo ni Mayor Klarex ang groundbreaking ceremony sa dugang 2-storey, 4-classroom building adlaw’ng Martes, Pebrero 13 nga gisaksihan sa mga kabataan, magtutudlo, ginikanan, kadagkoan sa City Hall ug DepEd.

 

Sa mensahe sa mayor, iyang gipasabot nga ang kapobrehon dili babag nga makakuha og kurso ug makalampos tungod kay gilantaw man kanunay sa iyang administrasyon ang edukasyon.

Ang maong classroom nga tukoron nagkantidad og P28,638,970.00 milyones nga ginama sa steel beams. Kini mao ang ikaunom nga classroom buildings nga gitukod ni Mayor Klarex sa iyang unang termino ug laumang madugangan pa kini sa umaabot nga mga bulan.

 

Nasayran nga pinasahi ang mga tukoron nga bag-ong classrooms sanglit aduna na kini built-in multi-media package nga naglangkob sa SMART TV, projector, sound system ug desktop computer.

 

Tumong ni Mayor Klarex nga mahatagan og kahamugaway ang mga estudyante lakip mga magtutudlo ug gisiguro gayud niini nga aduna kini functional nga fire alarm system sa panahon nga adunay mga panghitabo.

Dugang pa sa mayor lakip sa iyang classroom projects ang paghatag og mga lingkoranan sa estudyante, teacher’s table, grills sa mga bintana ug comfort rooms. (ACM/CIO Photos by KIM ZALDIVAR)