DAKONG garbo sa administrasyon ni Mayor Klarex Uy human gipasidunggan ang City Nutrition Committee sa ‘Nutrition Honor Award’, ang pinakataas nga pasidungog sa natad sa nutrisyon, atol sa 2023 National Nutrition Awarding Ceremony nga gipahigayon adlaw’ng Lunes, Pebrero 12, didto sa Manila Hotel.

 

Nasayran nga nag-inusara ang siyudad sa Cagayan de Oro nga nakakab-ot sa maong award karong tuiga, ug tungod niini, nakadawat ang dakbayan og cash grant balor P1 milyones.

Kini human usab napasidunggan ang siyudad sa sunod-sunod nga ‘Consistent Regional Outstanding Winner in Nutrition (CROWN) Award’ sulod sa tulo ka tuig.

 

Ang siyudad gi-ila sa paglambo sa ‘nutritional status’ sa mga kabataan human miubos ang mga kaso sa ‘stunting’ kon putot, underweight ug malnourished, uban sa pag-apud-apud sa breastfeeding kits ngadto sa mga nagpasuso nga inahan ug Infant and Young Child Feeding, counseling cards sa mga peer counselors, ug ang Urban Container Household Gardening (UCHG).

 

Mismo si Committee on Health Chairperson City Councilor Dra. Malou Gaane, kinsa mirepresentar ni Mayor Klarex Uy isip chairperson sa City Nutrition Committee, uban ni City Health Officer Dr. Rachel Dilla ug City Nutrition Action Officer Nenita Rabe ang midawat sa maong award atol sa national awarding ceremony.

 

Gawas sa siyudad, gipasidunggan usab sa individual awards sila si City Nutrition Program Coordinator Sherill Faith P. Española isip National Outstanding City Nutrition Program Coordinator ug Barangay Nutrition Scholar Loidaliza Vizcayno sa Barangay Balulang isip Contender sa National Outstanding BNS.

 

Mahinumduman nga mipailawum ang dakbayan pinaagi sa City Nutrition Committee sa usa ka validation nga gihimo sa National Nutrition Evaluation Team (NNET) alang sa Nutrition Honor Award niadtong Mayo 3-5, 2023.

Ang National Nutrition Awarding Ceremony usa ka tinuig nga kalihokan nga gipangulohan sa National Nutrition Council uban sa tinguha nga ma-rekognisar ang outstanding local government units (LGUs) ug local nutrition focal points (LNFPs) nga aduna’y epektibong nutrition programs alang sa mga Kabataan. (NLB/CIO/photos courtesy of NNC)