Hingpit nang gibuksan sa lokal nga kagamhanan sa dakbayan sa Cagayan de Oro ang kasaulogan sa Chinese New Year karong tuiga pinaagi sa pagpasiga sa mga Chinese lanterns nga nakasab-it palibot sa city hall, ug gisundan sa lion dance performance ug pagbukas Chinese food bazaar, Huwebes sa gabii, Pebrero 8 sa City Hall Executive Building, ning siyudad.

 

Atol sa programa, gipasalamatan ni Mayor Rolando 'Klarex' Uy ang Filipino-Chinese community tungod sa ilang dakong kontribusyon sa kalamboan sa dakbayan ug gihatagan usab og gimbug-aton sa mayor ang kamahinungdanon sa mga Filipino-Chinese Community sa ekonomiya sa dakbayan.

 

Samtang dako usab ang pagpasalamat ni Efren Uy, representante sa Cagayan de Oro Filipino-Chinese Community sa maong dakong bili nga gihatag sa dakbayan sa kasaulogan sa Chinese New Year.

Ang kalihokan gisugdan sa usa ka lion dance presentation nga gipasundayag sa Oro Christian Grace School.

 

Samtang lakip usab sa gibuksan ang Chinese Food Park sa may Duaw Park ning dakbayan isip usa sa mga aktibidad nga nakalinya karung tuiga pinaagi sa nagkadaiyang food stalls nga gimuntar sa mga negosyante ning dakbayan.

 

Ang maong kalihokan gisaksihan sa mga miyembro sa 20th city council nga gipangulohan ni Vice Mayor Bebot Rodriguez, City Administrator Atty. Roy Hilario Raagas ug mga department managers, mga miyembro sa Cagayan de Oro Filipino-Chinese community, ug Filipino-Chinese Chamber of Commerce and Industry. (GB)