Malipayong gipahibalo ni City Mayor Rolando ‘Klarex’ Uy nga gipasidunggan sa rehiyonal nga buhatan sa Department of the Interior and Local Government kon DILG ang dakbayan sa Cagayan de Oro sa natad sa maayong pagdumala sa panudlanan sa syudad.

 

Kini human gianunsyo sa DILG 10 nga 90 ka local government units sa tibook Northern Mindanao ang nakapasar kon ‘passer’ sa ‘2023 Good Financial Housekeeping’ tungod sa pagtuman sa Full Disclosure Policy nga nakasubay sa gabayan sa Commission on Audit.

 

Sumala pa sa DILG 10 nga lima (5) ka probinsya, usa (1) ka highly urbanized city, pito (7) ka component cities, ug 77 ka munisipyo sa rehiyon ang pasado sa maong pasidungog.

 

Ang Good Financial Housekeeping o’ kanhi Seal of Good Housekeeping usa ka component sa Seal of Good Local Governance kon SGLG nga nasakmit usab sa Cagayan de Oro sa unang higayon sa miaging tuig.

 

Sa iyang mensahe sa flagraising ceremony Lunes sa buntag, gipasalamatan ni Mayor Klarex Uy ang mga hintungdang buhatan sa city hall nga nakatabang aron makab-ot sa syudad ang maong talagsaong garbo ug dungog sama sa City Finance Department, City Budget Office, City Accounting Office, City Management Information System ug uban pa. (CIO)