PORMAL nang gibuksan kagahapong adlawa, Pebrero 19 ang SAULOG Art Exhibition alayon sa kasaulogan sa National Arts Month diha sa City Museum and Heritage Studies Center ning dakbayan.

Gipasundayag sa maong art exhibit ang mga obra sa local artist sa Cagayan de Oro nga si kanhi Pennesencio "Nonoy" Estarte isip paghandum ug pag-ila sa iyang gikabilin nga legasiya.

 

Sa maong okasyon, gidawat sa mga pag-umangkon ni Estarte ang Plaque of Appreciation nga gihatag sa kagamhanan ning dakbayan nga pinirmahan mismo ni Mayor Rolando ‘Klarex’ Uy ug ang gipasar usab nga resolution sa 20th City Council.

 

Sa iyang kabahin, dako usab ang pagpasalamat ni City Administrator Atty. Roy Hilario Raagas, kinsa mirepresentar ni Mayor Klarex Uy, sa dakong kontribusyon nga naambit ni Estarte alang sa pagpreserbar sa kulturang Kagay-anon.

 

Ang SAULOG Art Exhibit gipaluyohan sa dakbayan sa Cagayan de Oro, Department of Trade and Industry (DTI), ug Kagay-an Misamis (KaMi) Creative Council ug hugot usab nga gisuportahan sa mga local artists ug academe.

 

Nasayran gikan ni John W. Asuncion, ang overseer sa City Museum and Heritage Studies Center, nga bukas ang maong art exhibit hangtud Abril 30 ning kasamtangang tuig. (GB/Photos by Kim Zaldivar/Jay Arancon/CIO)