Sa tinguha nga mahingpit ang kalimpyo sa syudad ug ang seguridad sa mga motorista gikan sa mga spaghetti wires, gihangyo karon ni Mayor Rolando `Klarex’ Uy ang konseho ning syudad nga magpalabang og balaod alang sa underground utility cabling system.

 

“Sa underground na ibutang ang mga wires ug kable aron makita sa katawhan nga adunay gobyerno nga nagpakabana sa ilang safety,” pamahayag ni Mayor Klarex atol sa ceremonial nga pagtangtang sa mga spaghetti wires sa Barangay Carmen, Huwebes, Pebrero 22.

 

Ang hangyo sa mayor gipaabot pinaagi ni City Councilor Roger Abaday nga mitambong sa maong kalihokan nga gipasiugdahan sa CDO-ICT Task Force Klarex nga Serbisyo sa Kable.

 

Gipasabot ni Mayor Klarex nga ang nagbitay nga mga wires ug kable maoy usa sa nakahugaw sa panan-aw ug naghatag kakuyaw sa mga motorista diha sa ilang pagmaneho.

 

Dugang ni Mayor Klarex nga kung nahimo sa ubang lugar sa Pilipinas, ang underground utility cabling system dili usab imposible nga mahimo kini sa dakbayan uban sa suporta sa mga kompanya sa telepono ug ubang ahensya sa gobyerno.

 

Ang mayor naglaum nga molahutay ug magmalampuson ang tinguha nga malimpyo ang dakbayan gikan sa mga spaghetti wires ug kable. (ALR/CIO/Photos by Rod Constantino, Jomar Figuracion & Jay Arancon/CIO)