LARAW sa administrasyon ni Mayor Rolando “Klarex” Uy ang pagmugna og City Education and Development Department sa tinguha nga mausa ug mahatagan og dugang gimbug-aton ang education system sa dakbayan.

 

Matud ni Mr Jordan Ian Apat, sakop sa City College of Cagayan Board of Trustees ug city consultant, gihan-ay na ang mga rekisitos sa maong katuyoan ug laumang mapresentar kini sa konseho alang sa pagpalabang og ordinansa.

 

Gibutyag ni Apat, atol sa Management Committee meeting bag-ohay lang, nga gilantaw ni Mayor Klarex nga matutokan ang edukasyon gikan sa Early Childhood and Care Development (ECCD), paingon sa K-12 curriculum, technical-vocational ug hangtud na sa higher education.

 

Iyang gipasabot usab ang kamahinungdanon sa edukasyon sanglit usa kini sa mga nag-unang katungod sa mga Kabataan basi sa Article 26 of the Universal Declaration of Human Rights.

Kahinumdoman nga usa ang edukasyon sa mga nag-unang agenda ni Mayor Klarex sa iyang administrasyon. (ACM/CIO Photos JAY ARANCON)