Makabalik na pagpamuhi og baboy ang mga backyard hog raisers sa Cagayan de Oro human kini gi-deklarar sa Department of Agriculture (DA) nga ‘Pink Zone’ nga kategorya sa African Swine Fever kon ASF.

 

Apan, gipasabot ni City Veterinarian Dr. Perla Asis nga kinahanglan mosunod sa mga protocols ug gabayan sa ordinansa ang mga backyard hog raisers aron hingpit na nga ma-deklarar nga ‘ASF-free’ ang syudad.

 

Pipila sa mga gabayan nga nalatid sa BABAY ASF Ordinance No. 14532-2023 ang dili pagtugot nga mag-operate og baboyan ang wala naka-rehistro sa barangay.

 

Marehistro lang usab ang baboyan kung naka-comply sa Biosecurity Level 1 nga mao ang:

• Pag-kural sa tangkal aron walay laing makasulod

• Dili itigway ang baboy

• Kinahanglan adunay septic tank ang baboyan nga mag-basi sa gidaghanon sa baboy

• Drainage nga layo sa tangkal

• Gidili ang pagpakaon og pasaw o lamaw sa mga baboy

• Dili pasudlon ang mga viajeros/buyer sa baboy sa tangkal o baboyan, taman ra sa gawas sa baboyan ang tanang sakyanan

• Dili isulod sa tangkal ang sako sa bahog ug ibalhin sa plastic nga sudlanan

• Dili ipasulod ang pork/pork products sa tangkal

• Maligo ug mag-ilis og bag-ong sinina ug sapatos ayha mosulod sa tangkal

• Kinahanglan adunay “dedicated” nga sapatos, botas o tsinelas.

• Dili mosulod sa farm sulod sa 24 oras kung gikan sa laing baboyan, nagpalit og karneng baboy sa merkado, ug kung adunay flu-like signs (sip-on, ubo) o sakit sa tiyan.

 

Dihang naigo ang syudad sa ASF niadtong 2021, adunay 1,100 ka mga farmers o backyard hog raisers ang naapektuhan ug mokabat 4,600 ka baboy ang gipang-culling, ingon man balor sa P9-M indemnification fund ang na-release sa syudad alang sa mga apektadong farmers. (ALR/CIO/Photos by Reynan Baylin/CIO)