Nagpahimangno karon si City Mayor Rolando ‘Klarex’ Uy sa publiko nga magbantay sa kaugalingon, ilabina ang mga kabataan aron dili mataptan sa sakit nga pertussis kon ‘whooping cough’.

 

Sa iyang mensahe sa flagraising ceremony Lunes sa buntag, gisugyot sa mayor ang boluntaryong paggamit sa face masks isip panagang batok sa maong sakit nga pertussis, apan mag-depende kini sa rekomendasyon sa City Health Office.

 

Gikabalak-an ni Mayor Klarex nga mokaylap ang maong sakit dinhi sa dakbayan, sanglit nag-deklarar na og outbreak ang pipila ka lugar sa nasud sama sa Quezon City nga mitala og 23 ka kaso, Pasig City nga adunay 17 ka kaso ug Iloilo nga adunay pito ka kaso. Kadaghanan sa mga biktima pulos mga bata nga dili bakunado.

 

Una nang gitaho sa Department of Health (DOH) nga mitala na ang ilang ahensya og 568 ka kaso sa pertussis gikan Enero hangtud Marso ning tuig, mas taas kini kun itandi sa 26 ka kaso sa miaging tuig. (CIO)