Hugtanong giaghat sa syudad ubos sa administrasyon ni Mayor Rolando `Klarex’ Uy pinaagi sa City Veterinary Office ang mga barangay officials nga seryosohon ang kampanya batok rabies ilabina nga medyo alarming ang kaso sa rabies ning dakbayan.

 

Si City Veterinarian Dr. Perla Asis nibutyag nga taas karon ang kaso sa rabies sa Cagayan de Oro atol sa Rabies Forum nga gipahigayon karong adlawa alayon usab sa Rabies Awareness Month nga gitambongan sa mga barangay officers on health ug mga barangay biosecurity officers diha sa City Tourism Hall, Miyerkules, Marso 20, 2024.

 

Siya mipasabot nga dili matambalan ang rabies apan mahimo kining malikayan ug mapugngan pinaagi sa pagpabakuna og anti-rabies sa mga binuhing iro.

 

Nasayran nga daghan pa ang kulang sa kahibalo ug wala masayod sa angay buhaton kon mapaakan og iro, imbes moadto sa animal bite center aron magpa-inject didto na hinuon sa gitawag nga `tandok’.

Mokabat 300-600 ka tawo sa Pilipinas ang mamatay matag tuig tungod sa rabies.

 

Samtang gipahinumduman usab sa City Vet ang tanang nagbuhi og iro nga mahimong responsible pet owners, dili pasagdan ang ilang mga binuhing iro nga maglatagaw aron dili kini makapaak o maoy hinungdan sa aksidenti sa dalan o pagkatag sa mga basura.

 

Mihatag sa iyang mensahi si City Administrator Atty. Roy Hilario Raagas, kinsa maoy mi-representar ni Mayor Klarex, isip pagsuporta sa programa ug naglaum kini nga suportahan sa mga opisyales sa barangay ang programa aron hingpit nga masumpo ang kaso sa rabies sa Cagayan de Oro. (ALR/CIO/Photos by Roel Felicitas/CIO)