Gikatakda nga magpahigayon og road clearing operation ang Task Group Demolition sa Barangay 35 nunot sa hangyo ni Punong Barangay Jose Ligtas kalabot sa illegal structures nga nakabalda sa drainage project sa iyang barangay.

Sa gipahigayong tigom sa TG Demolition sa pagpangulo ni Antonio S. Resma, Jr., uban sa presensya ni PB Ligtas, nauyonan nga maghatag og notice of violation ang grupo ngadto sa mga tag-iya sa illegal structures.

 

Lakip sa mitambong sa tigom si Consolacion Punong Barangay Derby Pacudan gumikan sa pipila ka mga illegal settlers nga gipapahawa ilawom sa Marcos Bridge nga giingong nibalik ug nagbutang og tent daplin sa suba diin apil sa hatagan og aksyon.

 

Samtang, gipahibalo ni Resma ang mga punong barangay kalabot sa bag-ong Memorandum Circular No. 2024-053 sa Department of Interior and Local Government (DILG) nga magpahigayon og simultaneous nationwide nga Barangay Road Clearing Operations (BaRCO) karong Biyernes, Mayo 10, 2024, sugod alas-4:00 sa hapon.

 

Alayon niini, gimandoan ang tanang barangay sa tibuok nasud nga mosalmot ug magpahigayon og road clearing sa mga illegal obstructions ug structures diha sa ilang tagsa-tagsa ka mga barangay sa susamang adlaw ug oras.

Gimandoan usab sila sa pag-document sa ilang kalihokan pinaagi sa livestream o’ live coverage ug i-post kini sa ilang official social media page uban ang hashtag #NationwideBaRCOsaBagongPilipinas2024.

 

Lakip sa gimando ngadto sa mga barangay ang pagsumiter sa ilang BaRCO reports sulod sa bulan sa Mayo ug isumiter didto sa buhatan sa Liga ng mga Barangay sa Mayo 15, 2024. (ALR/CIO/Photos by Reynan Baylin/CIO)