World Health Organization
Department of Health 
NAGMALAMPUSON ang bag-ohay lang gipahigayon nga Special Program for the Employment of Students kon SPES dinhi sa dakbayan diin ubay-ubay ka mga kabatan-onan ang nakabenepisyo sa programa.
Sulod sa 20 ka adlaw, gitagaan og performance tasks ang mga benepisyaryo sa SPES nga kinahanglan buhaton sa ilang tagsa-tagsa ka panimalay.
Lakip sa ilang mga tahas ang pag-share sa social media sa mga importanteng balita sa dakbayan, paghimo og public health reminder videos, pagtanom o’ container gardening, pagsalmot sa lain-lain trainings/seminars ug pagpanghinlo sa ilang tugkaran.
Makadawat og tag-P5,000 cash assistance ang matag SPES beneficiaries nga aktibong misalmot sa mga kalihukan ug gilaumang adunay dugang pa nga mga benepisyaryo nga malakip sa programa sa mosunod nga higayon.
Ang SPES gipahigayon niadtong bulan sa Hunyo ning tuig ug natapos sa unang semana sa Hulyo, ug kini gipatuman sa Public Employment Services Office ubos ni PESO Manager Kathleen Kate Sorilla. (SPP)
