World Health Organization
Department of Health 
GIPASABOT sa City Vaccination Team ang tanang residente sa dakbayan nga ang A5 category sa vaccination rollout gilangkuban lang sa mga indibidwal nga benepisyaryo sa 4Ps (Pantawid Pamilyang Pilipino Program) ug Unconditional Cash Transfer Program (UCT), ug kadtong anaa sa listahan sa National Household Targeting System for Poverty Reduction (NHTS-PR) gikan sa DSWD.
Tungod niini, ang mga kwalipikado ubos sa A5 category limitado lang sa mga residente nga anaa sa listahan nga gi-andam sa Department of Social Welfare and Development (DSWD) alang sa tulo (3) ka nasangpit nga programa.
Giklaro usab ni Dr. William Bernardo, acting city health officer, nga dili mahimong basehan ang ‘certificate of indigency’ gikan sa barangay aron mahimong kwalipikado sa A5 category.
Subling gipahinumduman ang tanan nga buot magpabakuna nga magparehistro sa pre-registration link nga services.cagayandeoro.gov.ph/vaccprereg/ aron makadawat sa schedule ug venue sa pagpabakuna.
Kung nakadawat na sa text gikan sa vaccination team, mahimong ubanon sa 4Ps/UCT/NHTS beneficiary ang iyang ‘immediate family members’ (bana, asawa ug anak) nga nag-edad 18 anyos pataas para lakip nga mabakunahan.
Kinahanglan lang magdala og marriage certificate o kaha birth certificate nga magpamatuod nga immediate family member ang maong indibidwal. (SPP)
