DAKONG garbo ug kalipay ni Mayor Oscar Moreno ug sa CDO LGU ang pagsakmit sa ikatulong Galing Pook award kagahapo’ng adlawa, October 20, 2021 pinaagi sa entry “Health is Worth Fighting For, Cagayan de Oro Health Journey” pinaagi sa virtual celebration.

 

 

 

Ang maong entry nagpakita sa paningkamotan ug kalamboan ug pagdumala sa tibuok health system sa syudad ilabina ang kausaban sa JR Borja General Hospital, health centers, ang libreng hospitalization pinaagi sa health insurance, ang katukoran sa Center for Emerging and Re-emerging Infectious Disease (CEREID) panahon sa pandemya ug katukoran sa dugang 2 pa ka hospital alang sa una ug ikaduhang distrito sa Cagayan de Oro.

 

 

Nasayran nga 206 ka mga local government units ang misalmot sa maong indigay diin 10 lamang ang pillion, ug lakip ang Cagayan de Oro sa mga mananaog.

Kini mao na ang ikatulong higayon nga nasakmit sa Cagayan de Oro ubos sa administrasyon ni Mayor Moreno ang Galing Pook award diin una nang nasakmit niadtong tuig 2017 alang sa entry nga “Rising Up from the Mud”, nga naghulagway sa resilience sa Kagay-anons sa pagbarog ug paningkamot sa kagamhanang local nga matabangan ang katawhan human sa trahedya nga dala ni TS Sendong. Samtang gisundan na usab og laing Galing Pook award ang syudad sa tuig 2018 alang sa paglingkawas sa katawhan pinaagi sa pag-angkon og kaugalingong titulo sa ilang pinuy-anan.

Ang pagsakmit sa tulo ka mga Galing Pook award nagpakita ug nagpamatuod lamang sa tinuoray’ng serbisyo sa Moreno administration uban sa pag-abag ni Bise Mayor Kikang Uy ug sa majority bloc sa City Council. (ACM/Photos by Aicy Soriano/CIO)