80 ka Pantawid Pamilyang Pilipino Program (4Ps) beneficiaries sa pipila ka barangay mipailawum sa proyekto sa Ayala Foundation nga gitawag og Planting for Productivity (P4P) sugod atong Oktobre 18 ug molungtad hangtud sa Nobyembre 6, ning tuig.

 

Ang P4P usa ka capacity building project alang sa households ug mga komyunidad nga aduna'y panginahanglanon sa pagtubag sa hagit alang sa luwas ug sustansyadong pagkaon ug aron malikayan ang nagkagrabeng kalisdanan ilabina ning panahon sa pandemya.

Ang maong proyekto gisugdan sa tuig 2019 ug kasamtangang natunga karon sa duha ka hugna, ang Agrikita ug Agrikaya.

 

 

Ang Agrikita gitanyag alang sa mga natumbok nga 4Ps beneficiaries nga naila isip sustained gardeners ug hisgutan sa maong training ang economic recovery samtang Agrikaya ang gitanyag alang sa mga natumbok nga 4Ps beneficiaries nga aduna'y health nutrition problem ug nahulog sa low income diin hisgutan sa maong training ang capacity building.

 

Matud ni Ayala Foundation Senior Manager for Mindanao - Mr. Garrett Paolo Nolasco kinsa mao'y representante sa Ayala Foundation ug mao'y nagpundo sa maong programa, nga tumong niini nga matabangan ang mga 4Ps beneficiaries sa pagbaligya sa ilang mga utanon sa Ayala Mall lakip ang mga condominium ubos sa Ayala Group.

Mokabat sa 60 ka 4Ps beneficiaries ang anaa sa Agrikita samtang 20 ka 4Ps beneficiaries ang sa Agrikaya.

 

Modagan sa tag duha ka adlaw ang pagbansay sa pinili nga mga barangay: Barangay 24, Carmen, Patag, Puntod, Macabalan, Tablon, Lapasan ug Kauswagan.

 

Ang City Inter-Agency Committee mao'y nag-andam sa maong training uban sa City Social Welfare and Development, Agricultural Productivity Operations Office, City Local Environment and Natural Resources Office, City Nutrition Committee, Community Improvement Division, Oro Integrated Cooperative ug barangay council sa mga natumbok nga barangay. (Nica Borja/Photos by Roel Felicitas/CIO)