MIKABAT na sa 10,088 ka mga business establishments dinhi sa dakbayan sa Cagayan de Oro ang naka-renew sa ilang business permit, ug 482 niini pulos mga bag-ong negosyo.

 

Basi sa taho sa City Finance Department sa Enero 25 ning tuig, adunay pagsaka nga 17.4%, kung itandi sa milabay’ng tuig diin anaa lang sa 8,591 ka mga business permit renewals ang naproseso gikan Enero 4 hangtod 25 tuig 2021.

 

Magpadayon ang business permit renewal taman Pebrero 28 human giaprubahan sa City Council ang lugway sa deadline, ug gihangyo ang mga establisemento nga mag-renew na sa dili madugay aron dili makabayad sa multa.

 

Gipahinumduman usab ang mga negosyante nga aron makalikay sa daghang tawo, mahimong gamiton ang online platform sa business permit renewal nga services.cagayandeoro.gov.ph/bponline.

 

Dugang niini, abri usab ang satellite business registration center diha sa SM Downtown Premier sugod alas-10:00 sa buntag hangtud alas– 4:30 sa hapon, gikan Lunes hangtud Biyernes. (SPP)