Gilauman sa mga kadagkuan sa syudad ug Roads and Traffic Administration (RTA) nga mas mapalapdan pa sa mga miyembro sa Bicycle Enforcement & Event Personnel (BEEP) sa RTA ang pagpatuman sa traffic ordinance sa syudad human gitunol kanila ang 32 ka bag-ong mga bisekleta, lakip na ang duha nga gidonar sa usa ka establisemento.

 

 

Ang simpleng turnover gipahigayon kaganihang buntag, Enero 26, diha sa Kiosko Kagawasan sa pagpangulo ni City Councilor Romeo Calizo, chairman sa Committee on Roads and Traffic Management, uban ni RTA Head (ret.) Col. Rizalino Borlagdatan, RTA Chief Operation Officer (ret.) Col. Apolinario Hipolito ug mga personahi sa RTA.

 

Alayon niini, gipahalipayan ug gidasig ni Councilor Calizo ang pinili nga mga miyembro sa BEEP nga magmapainubsanon diha sa pagpatuman sa balaod trapiko ug likayan ang pag-abusar ug labaw sa tanan anaa kanunay ang pag-respeto.

 

Samtang, mapasalamaton usab si Col. Borlagdatan kang Mayor Oscar Moreno ug sa Konseho ning syudad sa suporta sa mga programa sa RTA. (ALR/Photos by Jay Arancon-CIO)