LIBRE’NG sakay alang sa senior citizen ang itanyag sa syudad atol sa gitakdang nationwide Senior Citizens Vaccination Day karong Enero 31 dinhi ning syudad uban sa pag-abag sa buhatan ni Kongresman Rolando “Klarex” Uy.

 

Lakip sa pagpangandam sa maong kalihukan ang pag-ila sa mga wala pa nabakunahi nga mga senior citizens diha sa nagkadaiyang barangay pinaagi sa Senior Citizen Committees ug chapter presidents agi’g tubag sa hangyo sa lokal nga kagamhanan.

 

Nagpahigayon usab ang mga barangay og rekorida aron manawagan sa mga senior citizens nga magpabakuna na aron malikayan ang risgo nga mahimong moderate – severe kung mataptan sa Covid-19 sanglit sila ang pinaka-vulnerable sector sa katilingban.

 

Ang mga vaccination sites nga bukas sa Enero 31 gilangkuban sa SM Downtown, SM Uptown, Limketkai, Robinsons, CityMall Iponan, Centrio Ayala Mall, Liceo Main Campus, Bgry. Puerto, Carmen, Lumbia, ug Taglimao.

Sa kasamtangan, mikabat na sa kapin 46,000 ang fully vaccinated nga mga senior citizens sa dakbayan ug dili moubos 13,000 ang midawat na sa ilang booster shot. (SPP/CIO)