SA nagpadayong pagsaka sa COVID-19 cases dinhi sa syudad, daghan niini mga local index nga nakabiyahe gawas sa Cagayan de Oro tungod sa nagkalain-laing tuyo ug rason.

 

Basi sa datos sa City Health Office (CHO) adlaw’ng Miyerkules, Pebrero 2, anaa sa 220 ka mga kaso ang local index kon itandi sa mga authorized persons outside of residence kon APOR, apil ang mga link nga anaa lamang sa 66 ug 9 ka ROF/LSI.

 

 

Ang mga datos sa nangaging mga adlaw nagpakita usab sa susamang statistics diin mas daghan ang local index nga adunay pagbiyahe gawas sa syudad.

 

Ang local index naglangkob niadtong mga ordinaryong katawhan ug walay kalabutan sa ilang trabaho ang ilang pagbiyahe sama sa pagsuroy-suroy ug pagbisita lamang sa ubang lugar.

 

Subay niini, padayon ang paghangyo ni Mayor Oscar Moreno ug sa Emergency Operations Center sa katawhan nga magmabinantayon ug magmatngon kanunay kung mogawas sa ilang panimalay, o ba kaha, magpuyo na lang sa balay. (ACMCIO)