NANAWAGAN sa katawhan ang Cagayan de Oro vaccination team nga suportahan ang ikatulong hugna sa COVID-19 National Vaccination Days alang sa 12 anyos pataas karong Pebrero 10-11 pinangulohan sa Department of Health, national government agencies, LGUs ug pribadong sektor.

 

 

Tumong sa duha ka adlaw nga nationwide simultaneous vaccination nga mas lapad ang maprotektahan batok COVID-19, mapaspasan ang ‘economic recovery’ ug makapadayon ang mga kabataan sa ‘face to face schooling’.

 

Karong Pebrero 10, siyam ka mga walk-in vaccination sites nga gidumala sa syudad ang abli alang sa pagpamakuna nga naglangkob sa Puntod Elementary School, Canitoan Elementary School, Agusan Senior High School, East City Central School Lapasan, Kauswagan Elementary School, City Mall Iponan, SM Uptown ug Limketkai, lakip ang mobile vaccination sa barangay FS Catanico.

 

 

Samtang sa ikaduhang adlaw sa Pebrero 11, madugang sa nasangpit nga vaccination sites ang SM Downtown Premier.

 

Kahinumduman misaka na ang herd immunity target sa Cagayan de Oro nga anaa na karon sa 599,929 ka residente o 80% sa 749,911 sigon sa projected population sa Philippine Statistics Authority sa tuig 2022. (AGP/Photo by Rhoel Condeza/CIO)