DUGANG P123 milyones ang gihatag sa Department of Budget and Management (DBM) sa nagpadayong total re-development sa City Memorial Park o ang mas naila kaniadto nga Bolonsori public cemetery.
Matud ni Engr. Armen Cuenca, hepe sa City Local Environment and Natural Resources Office (Clenro) ug sakop sa City Memorial Park Board, nga ang maong pundo gamiton alang sa pagpalambo sa park ug paghimo og picnic grounds sulod sa memorial park.
Kahinumdoman nga mokabat sa P367 milyones ang gigahin nga pundo sa administrasyon ni Mayor Oscar Moreno gikan sa P1 billion loan aron maatiman ang dugay na nga sementeryo.
Lakip sa social engineering process sa re-development ang sakto nga paglubong aron malikay ang ‘contamination’ sa ground water niini gikan sa ‘formaldehyde chemical solution’ nga maoy gamiton sa pag-embalsamar sa mga lawas nga posibleng mosunop sa yuta. (ACM/CIO)