TALIWALA nga giluwagan ang Alert Level status sa dakbayan, apan padayon gihapon ang istriktong pagpatuman sa mga ordinansa ug gabayan sa minimum public health standards ug community quarantine protocols.

 

Magpabiling ipatuman ang curfew hours sugod alas 11:00 sa gabii hangtod alas 4:00 sa buntag, lakip ang pagdili sa pagpamaligya ug pagpalit sa ilimnong makahubog atol sa maong mga orasa.

 

Gibawal usab gihapon ang ‘drinking in public places’ kon pag-inom sa ilimnong makahubog diha sa kadalanan, plaza, ug susamang mga lugar diha sa mga kabarangayan.

 

Gipahimangnoan ang mga residente nga posibleng maisyuhan sa ordinance violation receipt (OVR) ug masilotan ang mga masapong nakalapas sa mga ordinansa, ingon man posible usab mapasakaan og kaso kung masayran nga pipila na ka beses nakalapas ang maong indibidwal. (SPP)