MOKABAT na sa 743 ka mga kabataan ning syudad nga nag-edad og 5-11 years old ang nataptan sa COVID-19 sugod niadtong Marso 15, 2020 hangtud Pebrero 14, 2022.
Subay niini, nanawagan ang City Health Office sa mga ginikanan ug mga legal guardians sa mga bata nga nag-edad og 5-11 anyos sa pagpabakuna kanila aron malikayan ang moderate to severe symptoms kon ugaling mataptan sa virus.
Matud ni Dr. Ted Yu Jr, medical officer sa City Health Office, nga mahinungdanon ang vaccination sa maong age group ilabina nga gisugdan na sa syudad sa miaging adlaw ang vaccine rollout sa maong pediatric age group.
Dugang pa ni Dr. Yu nga nakigpulong na si City Health Officer Dr. William Bernardo sa mga principal sa private ug public elementary schools diin nasuta nga adunay 98,893 target population sa mga kabataan sa maong edad.
Kasamtanga’ng anaa pa lamang sa 2,812 ka mga bata ang nakapahimulos sa libreng COVID 19 vaccines ug naghangyo si Mayor Oscar Moreno nga mag-online registration na kadtong wala pa nakaparehistro. (ACM/CIO)