GIBUKSAN na usab sa City Scholarship Office ubos ni CSO Head Richel Petalcurin-Dahay ang online applications alang sa City College Scholarships sugod karong adlawa, Pebrero 17 hangtud Marso 11 ning tuig, alas-8:00 sa buntag hangtud alas-5:00 sa hapon.

 

Alang sa proseso, kinahanglan una mobisita ang mga aplikante niini nga link: bit.ly/ISDAApplication2022 aron masayran ang angay buhaton ug mga detalye kalabot sa programa.

 

Subay niini, gikinahanglan motambong usab ang mga aplikante sa “Online Applicants’ Assembly” karong umaabot Marso 19 pinaagi sa CDO City Scholarships Office FB page.

 

Human niini, isumite dayon ang mga rekisitos nga isulod sa usa ka long brown envelope uban sa pangalan, online application reference number, ug contact number diha sa 2nd floor, City Hall bridge, sugod Marso 21 hangtud Abril 8, alas-8:00 sa buntag hangtud alas-5:00 sa hapon.

 

Ang mapilian nga city scholars makadawat og mga benepisyo sama sa full tuition, matriculation ug other fees; monthly stipend ug holistic formation.

 

Kasamtangan, adunay 7,000 city scholars ang dakbayan ug adunay budget nga P250 million alang sa tuig 2022.

 

Gikatakdang i-anunsiyo ang listahan sa mga bag-ong city scholars karong Mayo 30 ning tuig.

 

Alang sa dugang pangutana, mahimong mobisita o motawag sa FB page, CDO CITY SCHOLARSHIPS OFFICE o sa numerong 0929-819-0819. (NLB/CIO/Infographic by CSO)