GIPAHIBALO sa buhatan sa City Local Environment and Natural Resources Office (Clenro) ang mga giya sa pagpakalot sa mga bukog sa kasamtangang gi-develop nga City Memorial Park o kanhi Bolonsori Public cemetery.

 

Basi sa giya, adunay tulo ka options sa serbisyo ang tagtungod o pamilya nga mahimong pilian kung magpakalot o magpahabwa sa mga bukog nga mahimong ipaagi sa kooperatiba sulod sa maong sementeryo, strikers o pakyaw system ug mismo ang kabanay ba niini.

 

Anaa sa P2,000 ang balayronon sa matag pantyon nga adunay bukog ug additional P500 matag bukog nga dugang niini diin lakip na sa maong gibayaran ang gamiton paghipos sa bukog kung ang kooperatiba sa city memorial park ang mohimo sa pagkalot, samtang mahimong mobayad usab sa mga “strikers” og P1,000 hangtud P1,500 depende sa sabot sa tagtungod.

 

Mahimo ra usab nga ang pamilya ang mangita og masuholan sa pagkalot apan sundon lamang ang saktong paghipos sa mga bukog.

 

Nalatid sa giya nga kinahanglang nakaseminar sa City Health Office ug nakasul-ob sa PPE ang mga mokalot ug mag-andam og karton nga sudlanan sa bukog nga adunay sukod nga 20 inchesx12x12; 2 ka roll nga packaging tape; plastic bag, Lysol disinfectant spray, 2 rubber laundry gloves, sticker nga sulatan sa detalye sa patay.

 

Alang sa dugang kasayuran, mahimong mobisita sa satellite office sa Clenro sulod mismo sa Bolonsori. (ACM/CIO/CLENRO Photo)